Home

Ես շատ ուրախ եմ, որ մեր երկրում էլ կլինի Հիսուս Քրիստոսի արձանը, քանի որ ամեն առավոտյան բոլորս արթնանալիս արտասանում ենք օրհնյալ տեր մեր Հիսուս Քրիստոս բառերը: Արձանի կառուցումը նաև բարոյահոգեբանական առումով մեծ դերակատարում է ունենալու:

Եթե Հատիսի գագաթին կառուցվող Հիսուս Քրիստոսի արձանը կառուցվի այնպես, որ դիմանա 100 տարի եւ ավելի, անշուշտ, կհամարվի լուրջ պատմամշակութային կոթող։ Մի առիթով ես արդեն ասել եմ, որ անկախ մեր հայացքների տարբերությանը ես օրհնում եմ պարոն Ծառուկյանի բարեգործական նախաձեռնությունները։ Հայ-առաքելական եկեղեցին հետագայում էլ պատրաստ է համագործակցել պարոն Ծառուկյանի հետ իր համաձայնության դեպքում:

Սա ուղղակի հրաշալի գաղափար է: Շատ գեղեցիկ, ինքնատիպ և ընդհանրապես տարածաշրջանում շատ նորարարական գաղափար է և վստահ եմ, որ այն մեծապես նպաստելու է Հայաստանում զբոսաշրջության զարգացմանը: Վստահ եմ, որ 3 տարի անց այս գեղեցիկ համալիրի բացման արարողությանը մենք նույնպես ներկա կլինենք: Հատուկ շնորհակալություն եմ հայտնում Գագիկ Ծառուկյանին, նա մեծ գործեր է անում իր երկրի ու ժողովրդի համար:

Կարծում եմ՝ սա այնպիսի վեհ գաղափար է, որին մասնակից դառնալու և թեկուզ մեկ քար դնելու ցանկություն կունենան բոլորը: Եղել եմ Լիբանանում ու շատ վեհ զգացողություն եմ ստացել Հիսուս Քրիստոսի արձանին այցելելիս: Աշխարհի տարբեր անկյուններից մարդիկ գալիս էին տեսնելու այդ հրաշալիքը: Վստահ եմ, որ Հայաստանում կառուցվելիք Հիսուս Քրիստոսի արձանը ևս դառնալու է մեր երկրի այցեքարտերից մեկը:

Հիանալի գաղափար է, և ամբողջ աշխարհին պետք է տեղեկացվի, որ մենք առաջին քրիստոնյա ազգն ենք: Մտահաղացումը շատ լավն է, և ես կարծում եմ, որ այն կդառնա նոր ուխտատեղի քրիստոնեական գաղափարներից ու վեհ արժեքներից հեռացած մարդկանց համար, դարձի կբերի մոլորյալներին:

Անչափ ուրախ եմ, որ մեր երկրում՝ քրիստոնեությունը որպես պետական կրոն առաջինն ընդունած Հայաստանում, կանգնեցվելու է Հիսուս Քրիստոսի՝ աշխարհում ամենաբարձր արձանը: Կարծում եմ անգամ, որ սա ուշացած նախաձեռնություն է: Բայց ինչպես ասում են՝ լավ է ուշ, քան երբեք:

Սրտանց ողջունում եմ այս գաղափարը, որպես քրիստոնյա ազգ, ցավոք, մենք հեռացել ենք Աստծուց և որպես Հայ առաքելական եկեղեցու զավակ՝ ես միանշանակ ողջունում եմ այս գաղափարը:

Հիսուս Քրիստոսի արձանի տեղադրումը շատ կարևոր է նաև զբոսաշրջության զարգացման տեսանկյունից: Վստահ եմ, որ աշխարհի տարբեր անկյուններից զբոսաշրջիկներ են ժամանելու Հայաստան՝ ծանոթանալու մեր երկրին, մշակույթին ու այցելելու Հիսուս Քրիստոսի արձանին: Այդ ամբողջ եկամուտն ուղղվելու է պետական բյուջե, որն էլ ծառայելու է երկրի զարգացմանը:

Ես, լինելով հայ քրիստոնյա, իհարկե կողմ եմ այս աստվածահաճո նախաձեռնությանը: Հաջողություն եմ մաղթում այս նախագծին,Աստծո կամքով թող այն ի կատար ածվի: Բեյրութում միշտ այցելում եմ Հիսուս Քրիստոսի, գիտեք՝ այդ վայրերն այցելելիս մի պահ լռում ես, սթափվում, ուզում ես հասկանալ քո անցյալը: Մենք միշտ պետք է հիշենք որտեղի՞ց ենք գալիս, ո՞վ ենք մենք և չմոռանանք, որ հենց մենք ենք առաջին քրիստոնյա ազգը: 
 

Առաջին անգամ Ռիո Դե Ժանեյրոյում եմ տեսել Հիսուս Քրիստոսի արձանը և հիացած եմ, սակայն կարծում եմ, որ հենց առաջինը պետք է Հայաստանում տեղադրված լիներ՝ որպես քրիստոնեությունն առաջինն ընդունած պետություն:

Հիանալի գաղափար է և կարծում եմ սա կլինի այն քայլերից մեկը, որը բոլորիս ավելի միասնական ու համերաշխ կդարձնի: Սրանով ամբողջ աշխարհի հայացքը կսևեռվի դեպի Հայաստան:

Սա շռնդալից և մեծ մասշտաբի, գուցե ամենամեծ մասշտաբի զբոսաշրջային նախագիծն է Հայաստանում: ՀՀ կառավարությունը պատրաստ է ամեն ինչ անել, որպեսզի նախագիծն ինչքան հնարավոր է արագ և առանց խոչընդոտների իրականություն դառնա:

Այս նախաձեռնությունը օգնելու է մեզ, որ մենք վերադառնանք մեր քրիստոնեական հավատքին։ Սա մեզ և մեր ժողովրդին կհիշեցնի, որ մենք պետք է դառնանք Քրիստոսի ճշմարտության ճանապարհը, որ ինքը եկավ և մեզ համար իրեն զոհեց։ Քրիստոսի մոնումենտալ արձանը այդ ամենի հիշեցման միջոց է դառնալու։ Ճիշտ այնպես, ինչպես սրբապատկերներն են, երբ դնում ենք տանը՝ չենք համբուրում, չենք խոնարհվում: Այդպես էլ արձանն է լինելու։ Այն մեզ օգնելու է, որպեսզի ավելի խորանանք ճշմարտության մեջ։ Շատ աղվոր նախաձեռնություն է։ Քրիստոսի ներկայությունը մեր և աշխարհի այլ ժողովուրդներին ցուցադրելու հնարավորություն է ստեղծվելու։ Ինչպե՞ս կարելի է այս ամենին ընդդիմանալ։ Շատ ողջունելի է։ Ես ինքս լիբանանահայ եմ, տեսեք, Բեյրութում կա տեղադրված Մայր Աստվածածնի մեծ արձանը։ Այն բարձունքի վրա է գտնվում և աշխարհի բոլոր երկրներից մարդիկ գալիս են այնտեղ, աղոթքներ են մատուցում։ Կան մեծ թվով զբոսաշրջիկներ։ Ուխտի հատուկ օր կա, այն նշվում է մայիսի 1-ին։ Մարդիկ քայլելով գալիս, կտրում են 10-20 կմ, մինչև որ հասնում են ուխտատեղի։ Մենք էլ, որ էստեղ ունենանք Քրիստոսի մոնումենտալ արձանը, որը կառուցվելու է պարոն Ծառուկյանի հովանավորությամբ, շատ լավ կլինի։ Այնպես որ, ողջունում և իմ օրհնանքն եմ տալիս այս նախաձեռնությանը։

Երբ Փարիզում կառուցել է Էյֆելյան աշտարակը, մարդիկ են եղել, որոնք դեմ են արտահայտվել, իսկ այսօր այն դարձել է Փարիզի խորհրդանիշը ու չկա մի մարդ, որը գնա Փարիզ ու չայցելի Էյֆելյան աշտարակ: Ես ողջունում եմ Հայաստանում Քրիստոսի արձանը կառուցելու գաղափարը, վստահ եմ, որ կարճ ժամանակ անց այն դառնալու է Հայաստանի կարևորագույն այցեքարտերից մեկը: